Урыстәыла Жәлар рартист Сергеи Безруков дызлахәу жәларбжьаратәи апрограмма «Ахәыҷқәа рфестиваль ду аныҩбжьы» Аҟәа имҩаԥысуеит ԥхынгәы 6 инаркны 10-нӡа.

РУСДРАМ асценаҿы идырбахоит Москва, Воронеж, Ниаган, Омск рҟынтәи хә-спектакльк.

Сергеи Безруков ароль хада ахьынаигӡо амузыкатә лакә «Апринц хәыҷы», Сергеи Пашьенко напхгара зиҭо Москватәи Агуберниатә театр аоркестр ацны апрограмма аанартуеит ԥхынгәы 6, 7 рзы;
«Сабду аца иакәын» — Атеатралтә хеидкыла «Атеатр ҿыц» (Воронеж), арежиссиор Викториа Шаламова;
«Ацгәы аҩны» — Ниагантәи ақәыԥшцәа ртеатр, арежиссиор Иулиа Хәычахметова;
«Каштанка» — Москватәи акьанџьақәа ртеатр, арежиссиор Амир Ерманов;
«Манолито Очкарик» — Ленинтәи акомсомол ашьақәгылара ХХ шықәса ахыҵра ахьӡ зху Омсктәи аобласттә ахәаԥшцәа қәыԥшцәа ртеатр, арежиссиор Анастасиа Старцева.

Аҳәынҭфилармониаҿы хәыда-ԥсада асахьаркыратә, анимациатә фильмқәа дырбахоит.

Ахыҷтәы фестиваль ду «Ашәҟәы» ашәҟәыҩҩцәа Полина Шьербаки Иулиа Весовои, аиҭагаҩ Сергеи Богдасарови, асахьаҭыхҩы Мариа Павликоваи алархәны аҟазаратә еиԥыларақәеи алитературатә ҟазарҭақәеи еиҿнакаауеит. Аусмҩаԥгатәқәа мҩаԥгахоит Ацәыргақәҵатә зал хадеи РУСДРАМ-и рҟны.

Ахәыҷқәеи ахбыџқәеи АхәРА апрограмма иалахәхоит Урыстәыла арҵаҩцәа нагақәа, ахәыҷқәеи атеатри акинои рзанааҭала аус рыдызуло аҟазацәа рҟынтәи аҟазарҭа — тренингқәа. Апрограммаҿы иҟоуп асценаҿы ахымҩаԥгашьеи, акәашареи, ашәаҳәареи рзы аҟаза-иклассқәа, абжьы аҿиаразы аҽазыҟаҵарақәа, акоординациа, апартниор аус ицуразы аҟазара.

Жәларбжьаратәи апрограмма «Ахәыҷқәа рфестиваль ду аныҩбжьы» ахәыҷқәеи ақәыԥшцәеи рзы еиҿкаау аҟазаратә фестивальуп, уи Урыстәыла акультура аминистрра ацхыраарала аҳәаанырцәтәи атәылақәа рҿы инагӡахоит, жәларбжьаратәи акультуратә усеицура аҿиара хықәкыс иҟаҵаны.