Адныҳәалараҿы иаҳәоит:

«Ҳаҭыр зқәу Нугзар Ҷыҷыкәа-иԥа!

Аԥсны Аҳәынҭқарра Акультура Аминистрра ахьӡала гәык-ԥсыкала ишәыдысныҳәалоит шәиубилеи. Шәара ганрацәала абаҩхатәра ду злоу, Аԥсны ахьынӡанаӡааӡо еицырдыруа сахьаҭыхҩуп. Шәҭыхымҭақәа ртематика ҭбаауп, еиуеиԥшым ажанрқәа аус рыдыжәулоит. Урҭ ирныԥшуеит ԥштәы рацәала иҩычоу ҳаԥсабара аԥшӡара, ахаара. Шәусумҭақәа уԥылоит Урыстәыла, Великобританиа, Америка, Италиа, Сан-Марино, Иапониа, Ҭырқәтәыла хазхаҭалатәи аколлекциақәа рҟны.

Иара убас Аԥснытәи аҳәынҭқарратә университет аҟазара аҟәша адекан иаҳасаб ала, шәара шәнапы алакуп аҿар рааӡара, аҟазара разхьарԥшра, ишәылшо зегь ҟашәҵоит асахьаҭыхыҩцәа ҿарацәа разыҟаҵаразы.

Аҟаза ду, арҵаҩы, шәааԥсарақәа зегьы хәҳаракыла ишьоуп – «Аԥсны Жәлар рсахьаҭыхҩы» ҳәа ахьӡ ҳаракы шәанашьоуп.

Зыԥсадгьыл аԥеиԥш згәы азыбылуа, шәара активла шәалахәуп ҳтәыла аполитикатә-ауаажәларратә ԥсҭазаара, шәыбжьы рықәшәыргоит ҳҳәынҭақарраҟны имҩаԥысуа аҭоурыхтә хҭысқәа зегьы.

Шәиубилеи шәыдныҳәало, гәыкала ишәзеихьасшьарц сҭахуп агәабзиара, агәамч, ашықәсынҵыра рацәа! Аҟазарахь ишәымоу абзиабара ҿымцәаауа, ҳазшаз алшара шәиҭааит арҿиамҭа ҿыцқәа раԥҵара!».